EVLİ BACILAR ÜÇÜN YADDAŞÇA!

Bu yazını çap edin və hər zaman oxumaq üçün görünən bir yerə qoyun!

Bir dəfə bir qadın Şeyx Muqbildən soruşdu: "Hörmətli Şeyx, mən ərə getməzdən əvvəl tez-tez oruc tutur, çoxlu namaz qılırdım və Quran oxumaqdan inanılmaz bir ləzzət alırdım... İndi isə Allaha itaətdən aldığım o şirinliyi itirmişəm".

Şeyx ona belə bir sual verdi: "Yaxşı... Mənə de görüm, həyat yoldaşına qarşı münasibətin necədir, ona qarşı nə dərəcədə qayğıkeşsən?"

Qadın cavab verdi: "Şeyx, mən sizdən Quran, oruc və namaz haqqında soruşuram, Allaha itaətin şirinliyi haqqında soruşuram, siz isə məndən ərim haqqında soruşursunuz. Bunun bura nə aidiyyatı var?"

Şeyx dedi: "Bəli, bacım, məhz elə budur! Nə üçün bəzi qadınlar imanın şirinliyini hiss etmirlər? Nə üçün Allaha itaətdən həzz almırlar və ibadətlərinin bərəkətli izlərini görmürlər?

Allah Rəsulu (sallallahu əleyhi və səlləm) buyurmuşdur:

«Qadın, ərinin haqqını əda etməyincə imanın şirinliyini dadmaz». (Səhih ət-Tərğib, 1939).

Bəs ərin haqları nələrdir? Səid ibn əl-Musəyyibin (Allah hər ikisinə rəhmət etsin) zövcəsi belə demişdir:

"Siz öz əmirlərinizlə (rəhbərlərinizlə) necə danışırsınızsa, biz də ərlərimizlə elə danışardıq." (Hilyətul-Övliya, 5/168).

Onun haqqı odur ki, qadının qəlbində ərinə qarşı ehtiram və dərin hörmət olsun. Rəvayət edilir ki, Allah Rəsulu (sallallahu əleyhi və səlləm) qadın səhabələrdən birindən soruşdu:

— "Ərin varmı?"

O: "Bəli" – deyə cavab verdi.

Peyğəmbər: "Ona qarşı necə davranırsan?" – dedi.

Qadın: "Ona itaət etməkdə heç bir qüsur etmirəm" – dedi.

Allah Rəsulu buyurdu:

"Ona qarşı necə davrandığına diqqət yetir, çünki o, sənin ya Cənnətin, ya da Cəhənnəmindir." (Səhih ət-Tərğib, 1933).

Yəni, ona itaət etməklə Cənnətə daxil olar, asilik etməklə isə Cəhənnəmə düşərsən.

Uca Allah buyurur: "Saleh qadınlar (Allahın əmrlərinə və ərlərinə) daim boyun əyən (müti) olanlardır." (Nisa surəsi, 34).

Səhabələr arasında Quran təfsirçisi kimi tanınan Abdullah ibn Abbas (radiyallahu anhu) bu ayədəki "qanitat" (boyun əyənlər) kəlməsini belə izah etmişdir: "Bu, ərlərinə itaət edənlər deməkdir". Lakin Allah "taiat" (sözə baxanlar) deyil, məhz "qanitat" buyurmuşdur. Çünki "qunut" sadəcə sözə baxmaq deyil, ən kamil formada və səylə itaət etməkdir.

Bəs qadın həqiqətən saleh və itaətkar olduğunu necə bilsin? Budur onun əlamətləri:

Əri ona baxanda sevinər.

Əri ona bir iş buyuranda, sözünə əməl edər.

Əri and içərsə, andının yerinə yetməsinə kömək edər.

Əri evdə olmayanda, həm öz namusunu, həm də ərinin malını qoruyar.

Əri yanında olmasa belə, onun qəzəbinə səbəb olan şeyləri bilər və onlardan çəkinər.

Onun xoşuna gəlməyən hərəkətləri etməz.

Onun istəmədiyi heç bir böyük və ya kiçik işi görməz.

Peyğəmbər (sallallahu əleyhi və səlləm) buyurmuşdur:

«Sizə Cənnətlik qadınlarınız haqqında xəbər verimmi? Onlar çox sevən, çox doğan (və doğmağa həvəsli olan), incildikdə və ya əri ona qəzəbləndikdə: "Bu mənim əlim, sənin əlindədir, sən razı qalmayana qədər gözümə yuxu getməyəcək" — deyən qadınlardır». (Səhih ət-Tərğib, 1941).

Saleh qadın Peyğəmbərinin (sallallahu əleyhi və səlləm) bu sözlərini xatırlayar:

«Allah, ərinə möhtac olduğu halda (yəni əri ona baxdığı halda) ona təşəkkür etməyən qadının üzünə (rəhmət nəzəri ilə) baxmaz». (Səhih ət-Tərğib, 1/581).

Saleh qadın unutmaz ki, Allah Rəsulu buyurmuşdur:

«Əgər bir insanın başqa bir insana səcdə etməsini buyursaydım, qadının öz ərinə səcdə etməsini buyurardım». (Səhih ət-Tərğib, 1938).

Həqiqətən də, qadının saleh əməllərinin qəbul olunma şərti ərinin razılığıdır.

«Qadın ərinin haqqını tam şəkildə yerinə yetirmədikcə, Allahın (əzzə və cəllə) haqqını yerinə yetirmiş sayılmaz». (Səhih ət-Tərğib, 1943).

Peyğəmbər (sallallahu əleyhi və səlləm) qadınlara xəbərdarlıq edərək buyurmuşdur:

«İki sinif insan var ki, namazları başlarından yuxarı qalxmaz (qəbul olmaz): Ağasından qaçan qul (qayıdana qədər) və ərinə asilik edən qadın (itaətə qayıdana qədər)». (Səhih ət-Tərğib, 1948).

Peyğəmbərimiz qadına Cənnətə necə girəcəyini göstərərək buyurmuşdur:

«Əgər qadın beş vaxt namazını qılarsa, (Ramazan) orucunu tutarsa, namusunu qoruyarsa və ərinə itaət edərsə, ona deyilər: "Cənnətin hansı qapısından istəyirsənsə, oradan daxil ol!"» (Əhməd 1/191, İbn Hibban 4163).

Bəzi bacılar bu hədisləri oxuyanda "Ərə hər şeydə itaət etmək çox çətindir" deyə bilər. Biz də ona deyərik: "Bəs sən elə düşünürdün ki, Cənnətə istədiyin qapıdan girmək belə asandır?!"

Üstəlik, Peyğəmbər (sallallahu əleyhi və səlləm) buyurmuşdur:

«Cəhənnəm nəfsin istəkləri (şəhvət) ilə, Cənnət isə (nəfsin) xoşlamadığı çətinliklərlə əhatə olunmuşdur». (Buxari 6487, Müslim 2823).

Bu hədis o deməkdir ki, insanla bu yerlər arasında bir maneə vardır; kim o pərdəni keçərsə (yəni nəfsinə çətin gələnə səbir edərsə), orada olar.

Həmçinin Peyğəmbər (sallallahu əleyhi və səlləm) buyurmuşdur:

«Qadın, əri yanında olduğu halda onun icazəsi olmadan (nafilə) oruc tuta bilməz və onun icazəsi olmadan evə heç kimi buraxmaz». (Buxari 4662, Müslim 1026).

Şeyx Albani (rahimahullah) bu hədisi şərh edərək deyir:


"Əgər qadına ərinin cinsi ehtiyacını qarşılamaq mövzusunda itaət etmək vacibdirsə, o zaman övladların tərbiyəsi, ailənin islahı və bu kimi digər vacib hüquq və vəzifələrdə ona itaət etmək daha çox vacibdir". (Ədəbun-Nifaf, səh. 282).