• 1. Şaban ayı Rəcəb ayı ilə Ramazan ayının arasında olduğu üçün insanların qafil olduğu aydır. 

• 2. Şaban ayı əməllərin Allaha qaldırıldığı aydır.

Usamə ibn Zeyd radıyallahu anhu rəvayət edir ki, dedim: 
"Ey Allahın Rəsulu, Şaban ayında oruc tutduğun qədər səni başqa ayda oruc tutan görmədim." Peyğəmbərﷺ buyurur: "Bu, Rəcəb ilə Ramazan arasında insanların qafil olduğu aydır. Bu ayda əməllər aləmlərin Rəbbi olan Allaha qaldırılır və mən də sevirəm ki, əməllərim oruclu halda qalxsın."*
(Nəsai,2357)

• 3. Şaban ayı Ramazan ayına hazırlıq ayıdır. Şaban ayı Ramazan ayının müqəddiməsi olduğu üçün Ramazan ayında olunan əməllər bu ayda da edilir ki, insan Ramazanı qarşılamağa hazırlanmış, nəfslər Rəhmana itaətə hazırlaşmış olsun.

Sələmə ibn Suheyl rahiməhullah buyurur ki, sələflər deyərdilər ki, Şaban ayı qarilərin ayıdır. 
Amr ibn Qeys rahiməhullah Şaban ayı girdiyi zaman ticarətini dayandırar və Quran qiraəti ilə məşğul olardı.
(Lətaiful-Məarif,135)

Əbu Bəkr əl-Bəği (rahiməhullah) deyərdi ki, Rəcəb ayı əkin ayıdır. Şaban ayı isə onu suvarmaq ayıdır. Ramazan ayı isə onu biçmək ayıdır. Kim ki, Rəcəb ayında əkməsə, Şaban ayında onu suvarmasa, Ramazanda məhsul götürməyə necə murad edə bilər?
(Lətaiful-Məarif,121)

Şaban ayı çoxlu oruc tutmaq ayıdır.

Aişə radıyallahu anhə rəvayət edir ki, mən Peyğəmbəriﷺ Şaban ayından başqa ayda çox oruc tutan görmədim.
(Buxari,Muslim)

Bundakı hikmətlər aşağıdakılardır:

1. İnsanlar bu aydan qafildirlər.

2. Bu ayda əməllər Allaha qaldırılır.

3. Ramazanda oruc tutmağın asan olması üçün nəfsi oruca öyrətmək vardır.

4. Ramazan ayını təzim xarakteri daşıyır. Fərz namazdan əvvəlki sünnə olan namazın fərzin haqqını təzim etməsinə bənzədiyi kimi.
(Lətaiful-Məarif,129)

İbn Qeyyim rahiməhullah belə buyurur:
"Ən xeyirli nafilə ibadətlər Ramazandan əvvəl və Ramazandan sonra edilən ibadətlərdir. Ramazanın əvvəli və sonrası tutulan oruclar vacib namazlardan əvvəl və sonra qılınan sünnə namazları dərəcəsindədir. Necə ki, sünnələr vacib namazlarındakı naqislikləri tamamlayır, eləcə də Ramazandan əvvəl və Ramazandan sonra tutulan oruclar Ramazan orucunu kamil edir.
(Təhzibus-Sünən,3/318)

• Ey şərəfli vaxtını ifrata vararaq zay edən, bu vaxtı pisliklərlə dolduran! 
• Sənin bu əməlin necə də pisdir. 
• Rəcəb ayı artıq ötdü və sən o ayda saleh əməllər etmədin. 
• Budur mübarək Şaban ayı. 
• Ey cahilliyi ucbatından vaxtını zay edən kimsə, ayıl! 
• Bu həlak yolundan çəkin! 
• Çünki bu ləzzətlər tezliklə səndən ayrılacaq. 
• Ölüm səni yaşadığın bu diyardan məcburi olaraq çəkib alacaqdır. 
• Xətalarından ixlaslı şəkildə bacardığın qədər tövbə et. 
• Əsas hədəfin Cəhənnəmdən salamatlıq əldə etmək olsun. 
• Bu əməl günah sahiblərinin tədarük etdiklərindən daha xeyirlidir.
(Lətaiful-Məarif,135)

Yoxladı: Yaşar Qurbanov

PAYLAŞ: