Uca Allah buyurmuşdur: “Ünsiyyətdə rahatlıq tapasınız deyə, sizin üçün özünüzdən zövcələr yaratması, aranıza məhəbbət və mərhəmət salması da Onun dəlillərindəndir. Həqiqətən, bunda düşünənlər üçün ibrətamiz dəlillər vardır.” (ər-Rum, 21)

İbn Abbas (Allah ondan razı olsun) demişdir: “Kişilər qadınlar üzərində hakimdir (idarəçidir) və qadınlar Allahın əmr etdiyi xüsuslarda onlara tabe olurlar. Qadının ərinə itaəti, eyni zamanda ərinin ailəsinə yaxşı münasibət göstərməsini və onun malını qorumasını da əhatə edir.” (Bax: “Təfsir ət-Tabari”, 6/287; “Təfsir İbn Əbi Hatim”, 3/939).
Ata`dan rəvayət olunur ki, Səid ibn əl-Musəyyibin (Allah ondan razı olsun) qızı belə deyirdi: “Biz ərlərimizlə siz öz hökmdarlarınızla davrandığınız kimi davranardıq!” (İbn Əbi əd-Dünya, “Kitab əl-İyal”, 546).

Muaz ibn Cəbəldən (Allah ondan razı olsun) rəvayət olunur ki, Allah Rəsulu ﷺ belə buyurmuşdur: “Əgər mən Allahdan başqa kiməsə səcdə etməyi əmr etsəydim, qadına ərinə səcdə etməsini əmr edərdim. Məhəmmədin canı Əlində Olan Allaha and olsun ki, qadın ərinin qarşısındakı vəzifələrini yerinə yetirməyincə, Rəbbi qarşısındakı vəzifələrini yerinə yetirmiş sayılmaz!” (Əhməd 4/381, İbn Macə 1853. Hədis həsəndir. Bax: “Səhih əl-Cami”, 5295).

Husayn ibn Mihsan (Allah ondan razı olsun) rəvayət edir: “Bibim mənə belə nəql etdi: ‘Bir dəfə hansısa bir ehtiyacla bağlı Allah Rəsulunun ﷺ yanına getdim. O məndən: «Ərin varmı?» – deyə soruşdu. Mən: “Bəli”, – deyə cavab verdim. O yenə soruşdu: «Onunla münasibətin necədir?» Dedim: “Gücüm çatdığı qədər hər şeyi onun üçün edirəm”. Allah Rəsulu ﷺ buyurdu: ««Ona qarşı münasibətinə (və onun yanındakı məqamına) diqqət yetir! Çünki o, sənin ya Cənnətin, ya da Cəhənnəmindir».».’” (Əhməd 4/341, əl-Hakim 2/189, ət-Tabarani “əl-Əvsat” 1/170. Hafiz əl-Munziri və şeyx əl-Albani hədisin səhihliyini təsdiq etmişlər).

İmam əl-Munavi bu hədis haqqında demişdir: “Yəni, ərinin səndən razı qalması sənin Cənnətə girməyinə, narazı qalması isə Cəhənnəmə girməyinə səbəbdir. Odur ki, ona qarşı xoşrəftar ol və günah olmayan məsələlərdə onun əmrinə qarşı çıxma.” (Bax: “Faydul-Qadir”, 2744).

Əbu Hureyrədən (Allah ondan razı olsun) rəvayət olunur ki, Allah Rəsulu ﷺ belə buyurmuşdur: “Əgər qadın beş vaxt namazını qılar, Ramazan orucunu tutar, namusunu qoruyar və ərinə itaət edərsə, ona: «Cənnətin hansı qapısından istəyirsənsə, ora daxil ol!» – deyilər.” (İbn Hibban, 1296. Hədis səhihdir. Bax: “Səhih əl-Cami”, 660).

İmam İbn əl-Cövzi demişdir: “Əgər saleh ər öz zövcəsini qınamağa (məzəmmət etməyə) başlayarsa, ağıllı qadın onun razılığını qazanmaq üçün səy göstərməli və ona əziyyət verən şeylərdən uzaq durmalıdır. Çünki əgər qadın ərinə əziyyət verərsə və ya onun xoşlamadığı şeyləri edərsə, bu, kişinin qəlbində narahatlıq yaradar və elə ola bilər ki, ilk fürsətdəcə onu tərk edər və ya başqası ilə əvəzləyər.” (Bax: “Əhkam ən-Nisa”, 69).

İbn Həcər əl-Heytəmi demişdir: “Bəzi alimlər belə deyirdilər: «Qadın üçün bunlar vacibdir: ərin yanında həmişə həyalı olmaq, onun qarşısında baxışlarını aşağı dikmək, əmrinə itaət etmək, o danışarkən susmaq, o evə gəldikdə ayağa qalxıb onu qarşılamaq və onu qəzəbləndirəcək hər şeydən çəkinmək».” (Bax: “əz-Zəvacir”, 2/340).
Şeyxülislam İbn Teymiyyə demişdir: “Allahın və Rəsulunun ﷺ haqlarını yerinə yetirdikdən sonra, qadın üçün ərinin haqlarından daha vacib olan başqa bir haqq yoxdur!” (Bax: “Məcmuul-Fətava”, 32/260).