Müsəlman qadın bədən cizgilərini bəlli edən dar paltarlar geyindikdə, fiqurasını ön plana çıxarıb "gözəlliklərini" nümayiş etdirdikdə, kişilərdən örtməsi əmr olunan bəzi bədən üzvlərini qəsdən açdıqda, diqqət çəkən və qeyri-adi geyimlərlə özünü büruzə verdikdə, qaşlarını aldıqda, evdən çıxarkən dodaqlarını boyayıb kosmetikadan əsirgəmədən bəzəndikdə, sosial şəbəkələrdə özünü nümayiş etdirdikdə və s. — bütün bunlar Şəriətin onun qorunması üçün qoyduğu sədləri zəiflətmək cəhdindən başqa bir şey deyil.

Əslində, o, Allahın qoyduğu hökmlərə qarşı daxili etirazını reallaşdırır və hicabın onun üçün (gözəlliklərini nümayiş etdirməyə) maneə olmaması üçün ona qarşı mübarizə aparır. Belə bir davranış göstərir ki, onun imanı sadəcə rəsmiyyətdən ibarətdir, hicaba münasibəti isə düzgün əqidədən deyil, yalnız cəmiyyətin normalarından, modadan və ya digər hisslərdən qaynaqlanır.

Burada Şeyx ƏbdurRazzəq əl-Bədrin (Allah onu qorusun) sözlərini xatırlatmaq yerinə düşər:

"Nümunə olaraq Ummu Sələməni (Allah ondan razı olsun) qeyd etmək olar. Peyğəmbər (sallallahu aleyhi və səlləm) paltarın ətəyini bir qarış aşağı buraxmaq lazım olduğunu dedikdə, o: «Belə olduqda (yeriyərkən) ayaqlar açılar» — deyə cavab vermişdi. Peyğəmbər (sallallahu aleyhi və səlləm) isə buyurdu: «O zaman bir dirsək qədər uzatsınlar, lakin ondan artıq olmasın!»"¹

Ummu Sələmənin (Allah ondan razı olsun) nümunəsi nə qədər gözəldir! Ayaq pəncələrinin görünməsinin icazəli olduğunu sübut etməyə çalışan indiki "müsəlman" qadınlar isə ondan nə qədər uzaqdırlar. Əgər ilk müsəlman qadın nəsli özlərini naməhrəm baxışlardan gizlətməyə, həya, paklıq və iffətlərini qorumağa can atırdılarsa, "müasir" müsəlman qadınların məqsədi tamamilə əksinədir. Onların bütün səyi bədənlərinin mümkün qədər böyük hissəsini nümayiş etdirməyə və bunu bacardıqca daha tez-tez etməyə yönəlib.

 ¹ Hədis səhihdir. Bax: "Səhih Əbi Davud", №4117.